《葆心直言－陈葆心》饮水要念掘井人

　　《葆心直言》话咁快兔年仲有几日就跳走，过去一年香港景况话差唔算好差，话好又唔系真
系咁好，做生意同打工嘅，都有少少怨气；就连绝少搞游行嘅股票人，上个星期都示威，抗议港
交所（００３８８）不理民情，一意孤行，要第二阶段延长交易时段硬上马。
　
＊华资经纪贡献良多＊
　
　　坦白讲，延长时间受影响嘅唔单止系股票人，中午食饭时间少咗，就连酒楼食肆嘅生意都大
受打击。过去几十年，由于有两个钟头食饭，故绝大部分推介会都喺午饭时段举行；但随着新时
段嘅实施，呢个优良传统肯定会成为证券界嘅集体回忆。
　　饮水要念掘井人，香港证券市场能够有今日嘅成绩，本地华资经纪贡献良多。我好唔明白，
点解港交所唔可以好好咁畀条路本地华资经纪呢？
　
＊未出世已经唔安乐＊
　
　　除咗证券界，香港大肚婆都上街抗议「双非」孕妇冲击产房。早前有言论曾经话，香港出生
率低，内地嚟香港生仔嘅都系有钱人，对香港肯定有好处。呢种论调，我唔敢话对定错，但就未
见其利先见其弊。私家医院只系向钱看，结果系香港产妇面对好大竞争，由于唔够人有钱，所以
都随时无位；私家医院生意好护士唔够，于是就向公立医院埋手，结果令到公立医院人手严重流
失，繁此种种，令香港未出世嗰班都好唔安乐！
　　游行示威有啱有唔啱。在百物腾贵下，有人上街要求加啲综援，我觉得帮吓老弱无所谓，但
如果年青力壮都摊大手板，就绝对无得倾，因为香港嘅大食懒实在太多、太多。
　　最后，祝各位在龙年身体健康，财星拱照，富贵吉祥。《中润证券有限公司主席　陈葆心》