新闻

国企红筹

《小传日记》有线翻身罗!纯官做掌舵;炒股唔炒市,到底搞边科?

2017/04/21 17:27打印本文章
  《小传日记》花旗巨挈排队放榜,噚晚(20日)美国运通派咗份靓靓季绩,帮道指打打气
,成功反击174点收报20578,总算止一止呢几日嘅跌势。
  不过,今日(21日)香江缸友都唔得闲理外围,齐齐望住有线宽频(01097)点样大
翻身都够晒精彩。仲有股王QQ(00700)、瑞声(02018)同舜宇(02382)齐
齐创新高,台泥(01136)畀阿妈大手笔私有化等,都令缸友睇到哗哗声。
  鱼缸继续炒股唔炒市,成交大减至611亿银左右,仍未摆脱整固格局!全日喺二万四关上
上落落。恒指本来都试过去返24190,点知尾市畀祖国内房拖累,恒指要瞓低14点收场,
报24042;国指就跌6点,收10050。
  
*运通季绩靓道指大反击,香江有头威奈何无乜力*

  有线宽频终于等到白武士打救,噚晚近十点钟左右,有线发通告指,大折让66巴仙三供五
,筹约7亿银,控股权就会易手至新世界(00017)主席纯官、远东发展(00035)主
席邱达昌,以及富力(02777)同百福(01488)主席,而纯官就会做有线大股东。
  虽然有线避过关门大吉,但系咁大折让抽水,缸友掟货以示dislike,有线开市即急
插两成,最低去到0.46银。但中午邱达昌开记者会大派定心丸后,有线成功大翻身,拗腰倒
升番逾16巴仙埋单,收0.71银。劲!
  至于同几位白武士相关嘅股份,如新世界、远东发展等,股价就只系轻轻跣低,各收报
9.64银及3.52银。

*有线玩供股大落复大上,北水爱QQ重钢受重伤*

  股王QQ近日深受北水宠爱,领军科网股向前杀敌,今日又一度再创上市新高,见
239.6银!不过话晒咁大只股,唔够两个月就升咗近16巴仙,有货缸友都趁高获利,埋单
微跌一格!
  重钢(01053)就惨惨猪,全日最多蒸发咗近33巴仙,埋单仍插低逾27巴仙收
1.50银,系最差表现鱼毛。点解咁曳,皆因公司公布,重组置入资产嘅方案比较复杂,仲未
知道可唔可以满足到监管要求。
  
*ASM破顶瑞声更加正,投资电动车联想亦好靓*
  
  搞半导体嘅ASM太平洋(00522)认真巴闭,礼拜二(18日)登完顶后,今日都仲
有力破顶,主要都系集团老细出嚟话,预计第二季收入继续有双位数增长!现时山顶位去到
115.3银,埋单都升超过半成,收112.5银。
  有钱齐齐搵,苹果近年咁卖得,帮佢做代工嘅瑞声(02018)都赚到盆满钵满,礼拜三
(19日)变身红底后都仲要系咁上,股价就似肥佬著笠衫─几大就几大,最新嘅山顶位已经去
到107.5银,全日升咗近4巴仙,报106银。虽然苹果唔系舜宇(02382)嘅大客,
但你好我也好,今日同瑞声一样双双破顶,已经去到61.75银高位插旗,埋单就升咗近1巴
仙报59.95银。
  颓咗一排嘅联想(00992)话要投资电动车,咁就发威上返5银大关最高去到5.17
银,全日升咗近2巴仙,报5.05银。

*阜丰搞批荡粉丝即掟货,台泥私有化今天有团火*
  
  喺神州生产味精嘅阜丰(00546)宣布话要配股抽水7.8亿银;折让近8巴仙配股,
缸友都掟货离场以示不满,全日跌低超过12巴仙,报5.26银。
  嚟自宝岛嘅台泥(01136),大股东话要以每股3.6银同缸友买返晒所有股份,大嗱
嗱溢价超过38巴仙。缸友收到风,心里只有一句「机会嚟啦」!台泥今日股价如升火箭咁升咗
超过三成,报3.44银,距离3.6银只系差超过4巴仙嘅水位。
  亚洲资源(00899)大股东西安交通能源今日话要放咗佢手上嘅股份,有成13.3亿
股,价钱就差唔多有五个亿,计返每股价格大约0.371银。今日亚洲资源就曾经最多爆升
46巴仙;但点知系一场虚火,全日计得番超过3巴仙进帐,收0.219银。
  缸外天气极度恶劣,天文台仲一度发出黄雨警号,缸友放工记得拎遮,快D返屋企喇!假期
愉快,请请!

  《编者按》本栏搜罗即日热门传闻,惟消息未经证实,《经济通》亦不保证内容之准确性
       本文只供参考之用,并不构成要约、招揽或邀请、诱使、任何不论种类或形式
       之申述或订立任何建议及推荐,读者务请运用个人独立思考能力自行作出投资
       决定,如因相关建议招致损失,概与《经济通》、编者及作者无涉。

十大人气排行

  • 评论
  • 新闻
  • 专栏文章