《小传日记》花旗噚晚无市，鱼缸今日（７日）一开市都系无乜方向，呆呆滞滞咁款。可能
系美联储即将会发表褐皮书嘅关系，观望气氛又浓厚咗。大市早段跌过少少，不过全日都叫做顶
得住，最终收市报２１４０１，升４６点，不过全日波幅都系得１２０点咁上下。国货指数就微
跌４点，收１１９５６。
　　唔觉唔觉，鱼缸已经连续升咗５日，加上夹埋嘅幅度唔细，唔少缸友都话唔似系反弹咁简单
，一副重展升浪咁款。后市会唔会真系好戏连场？缸友话都要睇番成交，好似噚日（６日）咁有
番７００几８００亿就似番啲样，不过今日一下子又缩番去５８２亿银，缸友都有少少失望。

＊缸边呆呆滞成交大收缩，葛霖别大象矢志上官途？＊

　　今朝早，米字国嗰边又再次有消息传出，大象（００００５）董事长葛霖将会离职。今年５
月就已经有过相关传闻，之后就更加搞到葛霖要出面澄清。唔少缸友仲记得，当时葛霖系信誓旦
旦咁话，未来一年仍会继续留任。点知澄清咗半年都唔够就再有佢老人家「劈炮」嘅消息，今次
更加传出，佢离开大象之后会获得英国政府委任做贸易大臣。
　　葛霖带住大象走出金融海啸呢个低谷，功功过过，就由历史去做判断。不过葛霖又几适合担
任贸易大臣呢个职务。当地传媒形容葛霖系「世上最受尊重银行家之一」；皆因佢喺商界人脉广
阔，同各路英雄都非常熟络，地位举足轻重，相信可以胜任这个职位。不过亦都有消息话，英国
首相卡梅伦正考虑几个可能嘅人选，葛霖只系其中之一，系唔系葛霖做就要等官方正式公布。有
大象粉丝就话，大象咁大间公司，即使高层经常出现「改朝换代」，对大象业务影响有限。全日
窄幅上落，微跌０﹒１巴仙。

＊超人笑盈盈和黄有钱景，生发发亮丽联通暂分手＊

　　望番其他大只佬嘅表现。前列份子入面见到超人嘅和黄（０００１３）走势唔错，先低后高
１﹒２巴仙埋单。有缸友就话，超人见完国家主席胡总，胡总一句叫佢继续运用影响力促进港粤
交流，和黄亦有码头业务喺深圳，得到胡总肯定，股价自然亦都要冲喜下。至于超人一号，亦有
逾１％升幅。
　　港所（００３８８）走势亦继续亮丽，最高上过近１３３蚊，全日就有１﹒１巴仙落袋。佢
地公布截止今年首八个月证券市场统计资料，首八个月每日平均成交金额系６１７﹒７亿银，按
年只系微微升１％。单计八月份，每日平均成交金额为５８１﹒６亿，按月升９％，其实已经有
所好转。噚日《鱼缸博客》喺１２８蚊叫买港所轮博见１３３蚊，斩获都算唔错。
　　走势转差嘅就有联通（００７６２），今日高开见过超过一年新高，不过好快就企唔稳，全
日倒跌０﹒９巴仙埋单。望番公仔图，联通喺条上升通道顶部之中出现「淡友反攻」，形势真系
唔系咁好。中移（００９４１）今日尾市亦都炒番上，埋单升０﹒９巴仙。

＊贷款略放缓内银脚软软，发水定上限地主各走各＊

　　据《财新网》报道，８月份「工、农、中、建」四大钱庄新增人仔贷款２１８８亿银，较上
月２４３０亿略有回落，符合监管当局均衡投放预期。而全部钱庄计算，上月新增贷款就有
５３２８亿银。四大行今日各走各路，噚日创出上市新高嘅农行（０１２８８）今日就回吐
０﹒３巴仙，工行（０１３９８）同建行（００９３９）亦都要软０﹒８巴仙及０﹒２巴仙，中
行（０３９８８）就升０﹒５巴仙。中行之前话会喺香江出人债，佢地自己都未公布详情，花旗
行就抢先一步，两年及三年人债嘅息率分别系２﹒６５％同埋２﹒９％，入场费１万蚊人仔。
　　今日继续有地主消息。近排政府就发水楼向业界咨询，据讲，发展局局长林郑月娥对于建筑
师学会嘅建议都几受落，将环保设施同完善生活设施嘅总楼面面积宽免合共上限设为１２％，日
后好有可能以此作为蓝本。地主今日走势比较呆滞，大好友（０００８３）跌０﹒３巴仙，新世
界（０００１７）无起跌。恒地（０００１２）同新地（０００１６）就分别升０﹒２同埋
０﹒７巴仙。

＊花旗行祝福马钢急弹高，家电回来了斗快又斗高＊

　　Ａ仔场今日先低后高，埋单轻轻升近０﹒１巴仙，再创近四个月高位。钢铁板块就继续硬净
，内地强制限电，多家钢厂高炉、轧钢生产线被关停，供应受影响，刺激钢铁价升连日全线上扬
，钢铁份子当然亦都造好。花旗行发表报告，注意到钢铁采购经理指数由４５反弹至５３，反映
接单情况由收缩转变为扩张，维持对马鞍山钢铁（００３２３）Ｈ股为投资首选，目标价为
４﹒８６银，今日马钢就升６巴仙。鞍钢（００３４７）、首长国际（００６９７）就分别升４
巴仙同３巴仙。
　　另一个大升板块系家电一族，经历完一个超长期跌浪之后，商务部公布，今年１至８月全国
家电下乡产品累计销售４６３６万台，实现销售额１００９﹒４亿人仔，比上年同期分别增
１﹒６倍同２﹒１倍。销售量较大嘅品牌分别有海尔（０１１６９）、同创维（００７５１）等
，两间公司今日弹高８巴仙及１０巴仙，另外ＴＣＬ多媒体（０１０７０）更加炒高两成埋单。

＊忘不了南山中策欲反击，先施忽异动缸友也?头＊

　　缸边消息就话，噚日中午复赛嘅中策（００２３５）仲未死心，目前正积极部署「反击」，
包括联同博智派员去美国游说ＡＩＧ向台湾当局提出上诉。据闻ＡＩＧ今个星期五（１０日）就
会举行董事会，相信将会系中策嘅「死线」，中策今日有番支持，埋单升６巴仙。大幅炒上嘅细
价股见到老牌百货份子先施（００２４４），全日大成交升３３巴仙。佢地最近都无乜特别消息
，系上个月业绩会到透露，大连地产项目可望年底开售，缸友可以留意下会唔会有特别消息跟尾
。体操王子持有嘅快意节能（０８０３２）宣布授出换股权，今日就回吐７巴仙埋单。
　　八下其他料，渣打香江进行一项调查，发现２８至３５岁人士之中，有５５％受访者最想喺
３５岁前置业，超过８５％希望３５岁有１００万或以上嘅身家。虽然今时今日，百万已经唔系
叫富翁，不过点都系唔少打工仔嘅一个目标。要储到１００万，话难唔难，话易更加唔易，缸友
多多努力增进投资知识，另外睇多啲《经济通》留意投资机会，肯定可以「理想达到」。请请！

　　《编者按》本栏搜罗即日热门传闻，惟消息未经证实，《经济通》亦不保证内容之准确性
　　　　　　　本文只供参考之用，并不构成要约、招揽或邀请、诱使、任何不论种类或形式之
　　　　　　　申述或订立任何建议及推荐，读者务请运用个人独立思考能力自行作出投资决定
　　　　　　　，如因相关建议招致损失，概与《经济通》、编者及作者无涉。