《小传日记》不经不觉，噚日（２８日）已经系鱼缸嘅七连升，噚晚花旗市轻轻回吐，缸友
大多数都估计，七连升局面会「断缆」。不过今日（２９日）鱼缸反反覆覆之下都叫咗顶得住，
开市一度再失守２１０００水平，收市前就轻轻踢番上，埋单微微升２点，叫做「八连升」成功
，收报２１０９３。国货指数就跌３０点，收报１１９４２。
　　个市整固成交就缩一缩，得番５６３亿银。

　　　　　　　　　　＊工行众粉丝抱怨供得少，私有３４９每股２７蚊？＊

　　今日最大单新闻，必定要数工行（０１３９８）。佢地正式公布供股大计，Ａ＋Ｈ供股，供
股比例同为每１０股供唔超过０﹒６股，发行最多约２００亿股，集资额总共最多４５０亿人仔
，而集资所得将用作补充资本金。计一计数，按推算，每股供股价大约系２﹒２４５银人仔，Ｈ
股方面折合约２﹒５７银左右，即系比上日收市价５﹒８８银折让５６％。
　　工行系全球市值最大钱庄，去年底嘅市值，达到２７００亿美金，即系大约２１０００亿银
，筹资４５０亿，认真系「湿湿碎」，所以今日股价都几好反应，有１巴仙进帐。小传有唔少客
仔都拥有工行股份，有啲仲系由２００６年上市揸到而家，但佢地对今次安排就认真不满。第一
，佢地嫌集资额真系太细，可以平价供股都无肉食；第二，就系供股比例太过古怪，１００股供
６股，即系一手分到６０股，手上面要有５万股先可以砌到齐头３０００股，避免手持碎股。有
粉丝更话，反正供嘅数目都唔会多，到时供股权上市就索性卖鬼咗佢算数。
　　工行另外一单料就系会将「囝囝」工银亚洲（００３４９），再次揽入怀抱里面。工行董事
会已经决议通过有关私有化决议，私有化工银嘅计划将包括纯现金方案，但具体内容就要等审核
后再行公告。孖屐就估计，如果纯系现金私有化，可能会用两倍市帐率去私有化，即系每股２７
蚊左右。如果以工行股票去买，就有可能增加到去２﹒５至３倍市帐率。

　　　　　　　　　　＊大象回回气中移同脚软，农行纳摩指已经冇惊喜＊

　　私有化工银，都差唔多由工行喺香江上市讲到今时今日，每年都总会有消息喺孖屐流传。传
咗咁耐，今次唔再系「狼来了」，最开心嘅除咗揸住３４９班粉丝之外，可以话系一班本地钱庄
，齐齐炒上庆贺。噚日已经炒上嘅大新系今日又再炒过，大新钱庄（０２３５６）弹高６巴仙散
场，大新金融（００４４０）就有４巴仙进帐，细细粒嘅创兴（０１１１１）升４巴仙。最奇怪
就系无私有化概念嘅宝哥哥（０００２３）亦都炒高近５巴仙，突破３０蚊，唯有当预测有好业
绩咁炒。中银香江（０２３８８）亦踢高２巴仙，破２０蚊同创超过年半新高。
　　大象（００００５）近日非常威水，连升七个交易日，不过升得咁急点都要回一回气，今日
向后行０﹒４巴仙。另一只重磅股中移（００９４１）就有消息，市传持有中移３﹒２％股权嘅
沃达丰（Ｖｏｄａｆｏｎｅ）正考虑出售其海外投资，包括中移。沃达丰持有约６﹒４２亿股中
移，涉及逾５００亿银，唔讲得笑，今日股价就软０﹒６巴仙。
　　农行（０１２８８）今日收市之后就正式纳入做摩指祖国成份股。不过之前已经有传唔少基
金偷步入定晒货，所以今日埋单反而要跌０﹒３巴仙。其他几行都系跌嘅居多，建行（００９３
９）、中行（０３９８８）、交行（０３３２８）同民行（０１９８８）就跌唔够１巴仙，招行
（０３９６８）有得升１巴仙。

　　　　　　　　　　＊山顶地靓价二手更心雄，反观地主佬载浮又载沉＊

　　噚日山顶聂歌信山地王以１０４亿银成交，唔少放紧盘嘅山顶豪宅盘都齐齐反价。瑞信报告
就话，块地位处独特，同一般豪宅或者大众市场有异，成交结果对整体楼市影响轻微，不过物业
市场气氛将保持乐观，维持香江楼市「大市同步」评级。佢地就维持长实（００００１）为首选
，因其估值便宜，同时相信新地（０００１６）、大好友（０００８３）一手销情表现理想。今
日地主股就个别发展，长实、新地升唔够１巴仙，大好友跌０﹒４巴仙，恒地（０００１２）就
有１巴仙落袋。
　　至于噚日公布业绩嘅恒隆地产（００１０１），花旗报告就话，佢地租金收入增长优于预期
，带动资产净值（ＮＡＶ）预测上升，因此将目标价由３４﹒８１银调高７％至３７﹒４１银，
维持「买入」评级，今日股价平收。
　　几只「本地姜」今日放榜，超人旗下嘅长建（０１０３８）半年只系赚２０亿银，跌近五成
，今日就唔见近１巴仙。ＡＳＭ太平洋（００５２２）半年就劲赚１１﹒５亿，升１４﹒３３倍
，中期息就有每股１﹒６银，即刻受到缸友追捧，弹高１０巴仙。

　　　　　　　　　　＊ＡＳＭ绩优弹高来庆祝，同是伸手牌果汁胜牛牛＊

　　Ａ仔场今日继续上探高位，轻轻踢高约０﹒５巴仙。中字派方面都有几多消息可以跟进下，
先讲讲两单饮品股嘅股权变动。蒙牛（０２３１９）嘅主要股东配售超过５０００万股，每股配
售价２３﹒９５银，埋单跌３巴仙，顶得住个配股价。另一单配旧股就系另一回事，汇源果汁（
０１８８６）公布主要股东分两阶段出售其全部约３﹒３７亿股，不过佢地嘅配股价去到６蚊，
竟然可以溢价一成配股，最终当然系受到缸友追捧，全日踢高近８巴仙。
　　车仔股亦见踩一踩油门，市传吉利（００１７５）最快将于下周完成对沃尔沃（富豪汽车）
嘅历史性收购，今日弹高１１巴仙，东风（００４８９）亦都跟住上３巴仙。跌幅榜入面见到珠
江钢管（０１９３８），佢地发盈警，预期中期纯利将倒退５０％，埋单插水９巴仙。

　　　　　　　　　　＊唉疯四登场半夜来起锚，如厕后洗手用手机亦然＊

　　八下其他料，明日（３０日）对好多人嚟讲只系一个普通嘅星期五，但对于本地苹果粉丝就
别具意义，因为明日就系「唉疯四」正式推出嘅大日子。有个别卖「唉疯四」嘅本地网络商，今
晚更加会凌晨开铺卖「唉疯」，真系瞓唔着想落街买宵夜，都可以顺便就去买部手机。
　　手机已经系现代人嘅必需品，唔记得带手机出街，可能比无带银包更「痛苦」，但有无谂过
手机原来仲污糟过马桶呢？无错，据英国消费者协会调查发现，检查过３０部手机，发现部分手
机嘅细菌，超过安全标准１０倍，最严重者更高出超过３９倍，比起马桶嘅拉水手制污糟１８倍
。卫生专家就话，手机上发现嘅大肠杆菌、沙门氏菌同埋金黄葡萄球菌会引起人肚泻，建议大家
定期消毒手机。各位缸友请记住，去完厕所同用完手机，最紧要洗手呀！请请！

　　《编者按》本栏搜罗即日热门传闻，惟消息未经证实，《经济通》亦不保证内容之准确性
　　　　　　　本文只供参考之用，并不构成要约、招揽或邀请、诱使、任何不论种类或形式之
　　　　　　　申述或订立任何建议及推荐，读者务请运用个人独立思考能力自行作出投资决定
　　　　　　　，如因相关建议招致损失，概与《经济通》、编者及作者无涉。