《小传日记》噚日（２７日）一尝２１０００嘅滋味之后，鱼缸好似食过番寻味咁款。今日
（２８日）开市仍然系有少少「吽逗」，不过下午卖地之前买盘就不断涌入炒高大象
（００００５），靠佢撑起半边天之下，鱼缸最高炒过去２１１９９，收市前最衰就系一班地主
股无心恋战，搞到只系升得１１７点，收市报２１０９１，成交就多番少少，有６２５亿银。Ａ
仔今日做得几好，不过国货指数跟唔上，只系升４１点收１１９７２。


　　　　　　　　　　＊地王争崩头成交逾百亿，大好友拍掌想起当年事？＊

　　全城缸友食完午饭都留意住荃湾大会堂卖地嘅情况。今次呢幅地位于山顶聂歌信山道１０３
号，土地面积２５﹒０９３万平方尺，地积比率１﹒３倍，喺山顶都算系大地皮。今次卖地气氛
亦都非常激烈，８０亿银开始，初段每口叫价１亿，之后减半至５千万银。整个卖地大部分时间
系「三国顶立」，由新世界（０００１７）、大好友（０００８３）同埋南丰「逐鹿中原」。最
后就由南丰伙九仓（０００００４）以１０４亿银投得，系预期嘅中间价咁上下，除一除每尺楼
面地价成３﹒２万银。虽然呢幅系豪宅地，指标性唔大，不过见到班地主投得咁兴奋，都证明大
家对后市都睇得几好。
　　又讲下一段小插曲，投地大约超过半小时嘅时候，叫价突破１００亿银大关，当时大好友嘅
黄志祥带头鼓掌。有缸友就讲笑，话唔知系唔系黄生谂起当年以１１８亿银投得「全港地王」一
役时嘅情景呢？

　　　　　　　　　　＊地王一拍完地主脚软软，恒隆派成绩股价无得益＊

　　望番地主股，股价表现就只可以用「先喜后悲」去形容。卖地之前，大部分大地主嘅股价都
唔系太差，个别都有少少升势，不过以过百亿银卖出地皮之后，地主股股价就好似「长江缺堤」
咁大幅滑落。恒地（０００１２）、新地（０００１６）同新世界都跌超过１巴仙，大好友争唔
赢块地皮，要跌０﹒７巴仙，长实（００００１）叫好少少，只系跌０﹒２巴仙。
　　今日同时系恒隆系打响业绩期嘅头炮，恒隆地产（００１０１）公布，截至今年６月底止，
基本盈利升近两倍，有６６﹒７亿银，不过亦只系孖屐预期嘅下限。缸友就话，上星期开始有钱
流入炒起恒隆地产，仲将佢股价踢到去两年高位，而呢啲钱就认真聪明，喺高位就开始慢慢走，
利润落咗袋先算。今日恒隆地产股价喺业绩之后就上过一转，不过好快就沽番落去，全日急泻３
巴仙。恒隆集团（０００１０）全年多赚３﹒７倍，埋单亦都唔见１巴仙。

　　　　　　　　　　＊大象等派绩股价先招积，并购惹憧憬钱庄好看头＊

　　如果地主股今日担正做「男主角」，咁本地钱庄就可以话系「女主角」，角色同样咁重要。
大象（００００５）承住近日炒上气势，今日就一鼓作气攻陷咗８０蚊大关，更加以接近全日最
高位收市，有２﹒６巴仙进帐。大象咁好表现，相信系唔少资金睇好佢下星期一（２日）份业绩
会好好睇，又见佢个价喺７０蚊顶得几似样，所以都好放心入市吸纳。
　　大象虽然系龙头，不过最标青就要数中银香江（０２３８８），全日踢高３巴仙，争少少就
再见番２０蚊关口，创出超过一年新高。中银香江咁样炒法，估计都系同人仔业务有好大关系，
上海市委常委杨晓渡出席中华总商会高峰论坛时就话，虽然上海同香江喺人仔业务有竞争，不过
香江喺离岸业务上有不可取代优势，因为系自由港，而上海亦唔会畀香江代替。上海更应该学习
香江，发展更多人仔相关业务同产品，发挥在岸金融优势。
　　本地钱庄另一大焦点就系并购，工银（００３４９）由噚日停赛到而家都未复赛，孖屐消息
满天飞，有人就话今次停赛系工银阿妈工行（０１３９８）提出，亦有传话工行董事会今日会商
讨有关议程。噚日已经炒起只永亨（００３０２），今日就连大新钱庄（０２３５６）、大新金
融（００４４０）都炒上，各升超过５巴仙。

　　　　　　　　　　＊Ａ仔高高高水泥玩重组，泊得好码头国药现强势＊

　　Ａ仔场今日就非常省镜，踢高超过２巴仙散场，上证指数更加突破埋２６００点大关，搞到
Ａ５０（０２８２３）亦炒上近３巴仙。国货场表现最好嘅系国药（０１０９９），埋单大涨超
过４巴仙。点解表现无端端咁好？皆因佢地会同世界知名嘅默克公司（Ｍｅｒｃｋ）合作，国药
会卖默克嘅产品，亦会一齐搞ＨＰＶ疫苗。
　　另一批好耐未有过好表现嘅水泥家族都齐齐炒上。祖国报章报道，新《水泥产业发展政策》
已经修订完毕，并通过十大部委会签，相信水泥行业新一轮兼并重组嘅大幕即将开启。现时喺香
江上市嘅几只中字派水泥股都系龙头大哥，重组合并，佢地一定系带头，安徽海螺
（００９１４）中建材（０３３２３）就各升３﹒４同２﹒７巴仙；华润水泥（０１３１３）亦
有６巴仙落袋。

　　　　　　　　　　＊紫金只限产股价终否极，亚运将开锣票价胜京奥＊

　　紫金矿业（０２８９９）星期一（２６日）停赛之后今日终于复赛，佢地宣布旗下矿山将会
限产，估计今年减产１吨黄金。只系限产唔系停产，已经系不幸中之大幸，复赛之后跌过一浸，
不过好快就重拾升轨，埋单踢高番３巴仙，重上５蚊关口。
　　有几只细价股，无论系成交同走势都几吓人，如烟（００３２９）连日炒上，今日就再弹高
多７成，上到去７﹒１仙水平，成交过亿银，镬铲友真系炒个不亦乐乎。正兴（００６９２）喺
３：３０ｐｍ开始急脚炒上，埋单急涨８成，成交都有超过５０００万银。
　　过完世界杯之后，另一项体坛盛事「亚运会」就会喺１１月于广州开展。广州离开香江都只
系两个小时火车车程唔够，相信唔少缸友都有兴趣上去睇下祖国同香江运动健儿嘅英姿。不过开
幕式嘅门票都真系唔平，最平都１６００蚊人仔，竟然比京奥开幕式最低２００蚊高出７倍，最
贵就成６８００蚊。有兴趣嘅缸友，不妨上亚运会嘅官方网址参详下。请请！


　　《编者按》本栏搜罗即日热门传闻，惟消息未经证实，《经济通》亦不保证内容之准确性
　　　　　　　本文只供参考之用，并不构成要约、招揽或邀请、诱使、任何不论种类或形式之
　　　　　　　申述或订立任何建议及推荐，读者务请运用个人独立思考能力自行作出投资决定
　　　　　　　，如因相关建议招致损失，概与《经济通》、编者及作者无涉。